من مذكراتي - بقلمي الفائض -

في يوم من أيام الصيف انا وثلاثة من أصدقائي كنا دايرين جولة حول العالم ( زعمه جولة حول المغرب ) بسيارة من نوع إر4 , لموهيم باختصار وصلنا الى مدينة الريش و ظلام علينا الحال , صافي تافقنا باش غادي ندوزو الليلة فهاد المدينة , وراكم عارفين الفقر و الشجاعة ماكاين لا اوطيل لا والو , كاين غير الحرب و القتال , دابا الموشكيل هو خاصنا نلقاو شي حائط نحطو حداه ل إر4 حيت الباب اليمنية خاسرة متاتسدش وراكم عارفين ل إر4 شحال غالية 

لموهيم بعد بحث طويل دام عدة دقائق لقينة لحيط حطينة عليه الطوموبيل , جا وقت العشاء فيصل كان وجد لينا واااااحد مولاتي الكاميلة فالغداء ونحن نطبق المثل الشهير: اللي خلا غداه لعشاه...ربي غناه , ونحن نطبقها في جميع أيام الرحلة ماشي حيت تنتسقرمو ..ألا ...غير عا الله وعسى ربي يغنينا

جبدنا لكاميلة آآآآح داكشي شحال بارد , او غادي نسخنو داكشي فالزنقة ماجاتش , و راكم عارفين الجوووووع لموهيم لحسنا لكاميلة وحنا مجموعين عليها وسط ل إر4 

باختصار جا وقت نعاس تجمعنا فل إر4  و راكم عارفينها شحال واسعة لموهيم كل وحد ناشر رجليه على لاخر , انا ماجانيش النعاس وخرجت من الطوموبيل او من لفضول اللي فيا خاصني نكتاشف كلشي تقولو غير وكالة الاثار الدولية مسيفطاني ندير بحت , لموهيم طلعت فوق الصور ما بان ليا والو معا الظلام ساعة انا راسي قاااصح خاصني نعرف , وانا نقز لقيت الربيع و بحال الى كاينين شي حجيرات ولا شي كراسة ديال الزليج و انا نفرح و بغيت نقولها لاصحابي ساعة الصور عااااالي عليا , بقيت تنقلب على كرسي ديال الزليج قريب للحائط باش نقز , لموهيم لقيتو... نقزت ... مشيت فيقت الدراري و قولت ليهم ها هي حديقة غي مور الصور و فيها كراسة ديال الزليج , نادو فرحانين و هزو الكواش ديالهم و طلعو فوق ل إر4 و نقزو الصور و معا مساكن مبوقييييين بالنعاس اللي لقا شي كرسي ديال الزليج فرش فوقو و نعس .... و فالصباح ناد كريم هو الاول و تايفيق فينا و تايغوت و مخلوع و خلعنا معاه و تيقول : انا لله و انا اليه راجعون .......انا لله و انا اليه راجعون ......انا لله و انا اليه راجعون , وانا قفزني و خاسر فيا النعاس شداتني لبكية و ماعرفت باش تبليت ولا آش واقع ولا شكون مات , وهو مازال تايعاود انا لله و انا اليه راجعون ....انا لله و انا اليه راجعون و تيقفقف, وقالينا جمعو لوقفة راكوم بايتين فمقبرة انا لله و انا اليه راجعون....انا لله و انا اليه راجعون و غي تحلو لينا العينين وحنا نضربوها بجرية واقيلة حتا كريم ضربها بجرية ( مع استبدال نقطة ال ج من التحت الى الفوق) و الله او علم 

لحاصول الحديقة صدقات مقبرة و الكراسة ديال الزليج صدقو قبور وانا الليلة كاملة وانا موسد قبر و فايق على انا لله و انا اليه راجعون و ما نعاودش ليكم كي داز عندي داك النهار !!!!